«Павлодар мемлекеттік педагогикалық институтының «Қазақстанның педагогикалық хабаршысы» атты ғылыми ақпараттық-талдау журналы диссертациялардың негізгі нәтижелерін жариялау үшін ҚР БжҒМ БжҒСБК 13.00.00 «Педагогикалық ғылымдар» бағыты бойынша ұсынылған басылымдар тізіміне қосылды».

ПМПИ-де үстіміздегі жылдың 21 қыркүйегінен 23 қазанына дейін Қазақстан Республикасының «ҚазССР-дағы тілдер туралы» Заңы қабылдануы мен халықаралық «Қазақ тілі» қоғамы құрылуының 20 жылдығына арналған мемлекеттік тіл айлығы өткізілді. Айлықтың мақсаты – мемлекеттік тілдің қолданыс аясын кеңейту, тілге деген сұранысты арттыру, қажеттілікті тудыру, кемшіліктеріміздің орнын толтырып, жетістіктерімізді одан әрі толықтырып, тілдік орта қалыптастыру. Сондай-ақ ұлтты сақтайтын құралдың бірі – адамдардың өз ана тілінде сөйлеуі.

             Осы айлықты өткізу іс-шаралар жоспары бойынша өткізілген іс-шараларға жоғары оқу орнының құрылымдық бөлімшелері мен оқытушылары және студенттері белсене қатысты. Атап айтсақ, қыркүйектің 21 күні іс қағаздарын мемлекеттік тілде жүргізу бөлімінің ұйымдастыруымен жоғары оқу орнының құрылымдық бөлімшелеріндегі іс қағаздарын мемлекеттік тілде жүргізетін және дайындаумен айналысатын мамандардың арасында «Іс қағаздарын жүргізу ісінің таңдаулы маманы» байқауы табысты жүріліп өтті.

Сондай-ақ 22 қыркүйек күні Қазақстан Республикасының алғашқы Президенті Н.Ә. Назарбаевқа арналған «Менің Отаным – Қазақстан» тақырыбында әдеби-музыкалық бағдарламалы гүлдер мен кітап көрмелері ұйымдастырылды. Іс-шараға жоғары оқу орнының оқытушылары, студенттер және колледж оқушылары белсене қатысты.

          Тарих , экономика және құқық факультетінің, экономика, құқық және философия кафедрасының оқытушысы Гүлфира Елубайқызы Өтепованы докторлық диссертациясын табысты қорғауымен құттықтаймыз!

          ПМПИ ұжымы Гүлфира Елубайқызының ары қарайғы ғылыми жұмысында шығармашылық табыс тілейді!

Үстіміздегі жылдың 15 қазаны күні сазгер әрі әнші Тұрсынғазы Рахимов ПМПИ-де жоғары оқу орнының басшылығының арнайы шақыруымен ПМПИ-дің оқытушы, студенттерімен кездесу жасап, концерт қойды.

Сазгер еліміздің ұлттық мәдениетінің дамуына сүбелі үлес қосып жүрген азамат.

Тұрсынғазы Рахимов 80-ге жуық әннің авторы. Әндерінің көбі ақиық ақын Мұқағали Мақатаевтың сөздерінде жазылған. Сондықтан біртуар ақын Мұқағали Мақатаев пен сазгер Тұрсынғазы Рахимов шығармашылық тығыз байланыста деуге болады. Сондай-ақ Қадыр-Мырза-Әли, Фариза Оңғарсынова секілді көптеген ақындардың өлеңдеріне ән жазып, оны нақышына келтіріп орындап жүрген танымал әншілердің бірі.

Кездесу соңынан ПМПИ проректоры, доцент С. Елікпай Тұрсынғазы Рахимовқа институт басшылығы атынан алғыс білдірді.

             Елімізде жыл сайын танымал ақын, жазушы, қоғам қайраткерлерінің шығармаларынының мазмұнын ашу, оқырмандарға насихаттау мақсатында республикалық «Бір ел – бір кітап» акциясын тұрақты ұйымдастырып келеді.

Акцияны ұйымдастыру комитетінің төрайымы халық жазушысы, мемлекеттік сыйлықтың лауреаты, ақын Фариза Оңғарсынова бастаған ұйымдастыру алқасы осы жылы жалпыұлттық оқу үшін қазақтың шоқ жұлдызы, біртуар лирик ақыны Мағжан Жұмабаевтың шығармаларын ұсынды.

             Қазақтың ұлы жазушысы, педагог, лирик ақын, қоғам қайраткері Мағжан Жұмабаевтың шығармаларының мазмұнын ашуға арналған іс-шаралар үстіміздегі жылдың 21-24 қыркүйегі аралығында еліміздің әр түкпірінде жүрілді.

Павлодар мемлекеттік педагогикалық институты да дәстүрлі іс-шараға белсене қатысып, көптеген іс-шаралар ұйымдастырды. Аталмыш акция аясында «Мағжанның асыл сөзі» атты студенттердің шығармашылық жұмыстарының конкурсы өтті. Сондай-ақ «Мағжанның сара жолы» тақырыбында кітаптар көрмесі ұйымдастырылды. «Мен кітапты таңдаймын! М. Жұмабаевты қайталап оқысақ» тақырыбындағы әдеби-кездесу ПМПИ колледжінің оқушыларына арналды. Әдебиет жанашырлары «Мағжан Жұмабаев әлемі» тақырыбында электронды қорлар залында веб-саяхат жасады. Іс-шараларға М. Жұмабаевтың шығармаларын сүйіп оқитын барлық оқырмандар мен студенттер атсалыса қатысты.